Халык санын алу үзенчәлекләре турында шәһәр статистика бүлеге начальнигы Альбина Гедминас сөйләде. Ул билгеләп үткәнчә, чара 2002 елның 25 гыйнварындагы 8-ФЗ номерлы «Бөтенроссия халык санын алу турында» Федераль законы нигезендә үткәрелә.
«Әлеге закон нигезендә халык санын алу 10 елга бер тапкыр үткәрелергә тиеш. Соңгы халык санын алу 2010 елда узды. Хәзер «Халык санын алу - 2020» бара. Аңлаешлы сәбәпләр аркасында, ул бер елга соңарды. Узган халык санын алу безнең шәһәрдә 513 мең кеше яшәвен күрсәткән. Әлеге халык санын алу нәтиҗәләре буенча Чаллыда күпме кеше яшәгәнен беләчәкбез, чөнки төп бурыч – халык исәбе һәм халыкның демографик, икътисади һәм социаль характеристикаларын алу», - диде ул.
Халык санын алуның төп принциплары - халык санын алуның гомуми колачы; халыктан турыдан-туры мәгълүмат алу; кешеләрнең үзбилгеләнеше; халык санын алу вакытында алынган мәгълүматләр конфиденциаль (бу халык санын алучының контрактында язылган).
Контролерлар инде 29 сентябрьдән эшкә кабул ителгән һәм эшли башлаган. Алар адреслы хуҗалыкларны тикшерү белән шөгыльләнәләр. Аннары алар имин булмаган фатирларны, ягъни потенциаль куркыныч кешеләр яши торган фатирларны билгеләп үтәчәкләр. Әлеге адреслар буенча халык санын алучы участок полиция хезмәткәре белән барачак.
Халык санын алуның яңалыкларының берсе - волонтерлар эше.
Бу исәпкә алуның үзенчәлеге шунда ки, бу беренче цифрлы исәпкә алу.
Интернетта халык санын алуны Дәүләт хезмәтләре порталында шәхси кабинетлары булган, расланган яки стандарт битләре булган һәркем узарга мөмкин. 15 октябрьдә сылтама барлыкка киләчәк, ул 8 ноябрьгә кадәр эшләячәк. Гаилә әгъзасы үз гаиләсен, ягъни барлык йорт хуҗалыгын яза ала. Мәгълүматләрне җибәргәннән соң, кешегә QR-код киләчәк. Аны кәгазьдә яки телефонда саклап калырга, ә аннары халык санын алучыга (халык санын алучы килгәч яки халык санын алу участогына килгәч) күрсәтергә кирәк булачак. Халык санын алучы бу кодны үз планшетына керткәч кенә, бу хуҗалык исәп алуны узды дип саналачак. Хәзер исәпкә алу кәгазьләре юк – халык санын алучылар барлык мәгълүматларны электрон рәвештә үз планшетларында тутыралар.
Әгәр кемнеңдер халык санын алучыны фатирына кертәсе килми икән, QR-код белән стационар участокка килергә мөмкин. Шәһәрдә барлыгы 42 участок оештырылачак, аларның адреслары тиздән шәһәрнең рәсми сайтында урнаштырылачак. Эш сәгатьләре 8:00дән 20:00гә кадәр.
При использовании информации просьба ссылаться на Управление информационной политики и по связям с общественностью.
Пәнҗешәмбе, 7 октябрь 2021, 16:25